محمد سليمان يكتب - بالعامية المصرية عن إسكندرية (2) إنسطاسي والحقانية

دكتور محمد سليمان 

نكمل كلمنا عن حي اللبان ونتكلم عن شارع مشهور هناك باسم "اسطاسي"
اللى هنوضح اسمه الصحيح بعد كده وهو موازي لشارع السبع بنات اللى اتكلمنا عنه فى المقال السابق .. بس مش بنفس امتداده يعنى تقريبا من نص شارع السبع البنات فى شارع موازي على إيدك الشمال وانت وشك للبحر أو ميدان القناصل أو زي ما بنقول وانت وشك للمنشية "الكبري" أيوه الكبري لأن فى المنشية الصغيره والمنشية الصغيرة عموما وسط الاسكندرانية بيوصفوها ويقولوا عليها "عند بتوع الورد" واللى لو كملت فيها على طول وأنت ظهرك لمحلات هانو .

- بمناسبة محلات هانو لازم نذكر محلات شيكوريل وصدناوي وبنزيون وعدس اللى ليهم قصة هبقا أحكي عليها مرة تانيه فى مقال تاني باعتبارها أشهر محلات لليهود قبل ما يخرجوا من مصر - نرجع لمرجوعنا لو هانو فى ظهرك عند منفذ النساجون الشرقيون .. ومحلات زلط للملابس المشهورة عند الاسكندرنية على يمينك هتدخل فى سوق الحقانية أو تحديدا سوق ظهر الحقانية وطالما جبنا سيرة الحقانية ما قدرش أعديها وما قولش معلومه عنها "سراي الحقانية"

أو محكمة استئناف الإسكندرية الحالية اللى هيه اتبنت على طراز الفنون الجميلة وده طراز معماري إحيائي ظهر في فرنسا في أواخر القرن الثامن عشر ليعبر عن العمارة الكلاسكية الجديدة وهو خلاصة لقرنين ونص من العمارة الأكاديمية الملكية وعصر ما بعد الثورة الفرنسية المهم لك أن تفخر كونك اسكندراني لأن المبنى اتعمل فى اسكندرية ووهو أقدم المحاكم المصرية علي الإطلاق افتتحة الخدوي إسماعيل والمبنى ده هو اللى اضرب فيها رصاص على جمال عبد الناصر.

وكان في الحقانية برضوا مبني البورصة القديم والاتحاد الاشتراكي وبما إني بحب عملية التأصيل للكلمات أحب أضيف معلومة إن أصل كلمة "بورصة" بيرجع إلى اسم عائلة اسمها فان در بورصن (كانت بتشتغل فى مجال البنوك وكان عندهم فندق فى بلجيكا وسموه بورصن واتفقوا إن الفندق يبقا مكان تجمعهم أو تجمع التجار لتداول السندات والأوراق المالية ومن هنا جه اسم البورصه وبما إن القهاوي فى المنشية أو ميدان القناصل سابقا فى اسكندرية كان مكان لتجمع التجار الإنجليز واليونان واليهود وغيرهم من الأجانب على القهاوي فسموا القهاوي أو المنتديات البورصه عشان كده فى المقاهي القديمة نجد عليها اسم بورصة كذا أو كذا ومثال واضح على كده البورصة التجارية اللى هيه دلوقت القهوة التجارية

 وبدأ استخدام مصطلح بورصة فى اي مكان يتجمع فيه التجار اللى هو كان وقتها القهاوي .. أنا نسيت أقول حاجه مهمة أوي عن مبنى المحكمة أو سرايا الحقانية وهو أنها بتحتوي  علي أقدم تاريخ مكتوب عن الفرمانات والمخطوطات القانونية والوثائق بالإضافة إلى مقتنيات أثرية فنية وأثرية مذهلة زي أختام بالمحكمة اللة تصنف دلوقت قطع فنية نادرة، والسيف والميزان رمز العدالة، وختم الملك فؤاد، بالإضافة إلى ساعات حائط نادرة، واللوحات الفنية الخاصة بكبار فناني العالم ....

 نرجع لمرجوعنا شارع اسطاسي مش بنفس الوسع بتاع السبع بنات وتقدر تدخل ليه بعد أشهر واحد بتاع عصير قصب أو أقدم واحد بتاع عصير قصب هناك يزيد عمره عن خمسة وتلاتين سنه كنت بشرب عنده  وانا بلف فى اللبان :) اسمه عصير السد العالي على الترماي بعد بتاع العصير ده بحوالى مائة متر أو يزيد تقدر تدخل على شارع اسطاسي من أي شارع شمال وانت وشك للبحر وبالأدق الاسم الصحيح "أنسطاسي" واعتقد إن ده نسبة إلى الفنان الذي استعانت به الكنيسة القبطية لإحياء رسم الأيقونات ففي الفترة بين القرن السابع عشر إلى التاسع عشر الكنيسة القبطية لجأت إلى بعض الفنانين المصورين مثل يوحنا الأرمنى وأنسطاسى الرومى وإبراهيم الناسخ  وده بعد ما تدهور فن الأيقونات من قبل القرن السابع عشر لإحياء رسوم الأيقونات بالمناسبة أيقونة أنسطاسي يعنى أيقونة القيامة وتحليل اسم الشارع أو إرجاعه إلى أصوله ده تقديري واستنتاجي أنا عن اسم الشارع ده برضوا ونلاحظ إن وكيل بطريركية الأقباط الأرثوذكس بالإسكندرية هو قدس أبونا القمص أنسطاسي الصموئيلي في بدايات القرن عشرين والشارع دلوقت اسمه شارع الجزائر لما قدمته الجزائر من مساندة لثورة يوليو .. وفي أكبر وصله بين الشارع السبع بنات وشارع إنسطاسي إللى أخرها من على اليمين جامع رمضان شحاته فىه عم شحته بتاع أحلي مكرونه موجود فى المنطقة :) ده غير فرن بساس اللى فى أخر الشارع من ناحية المنشية.


القصة بقا الأهم وبغض النظر عن التأصيل لاسم الشارع وإن الشارع ده ملئ بمحلات وتجارة الأدوات الصحية وبعض الأدوات الكهربية كان يوجد سينما هنا اسمها سينما وداد والسينما ديه اتهدمت وطلع مكنها عمارة وده موضوعنا فى البوست القادم "السينيمات المندثرة فى اسكندرية" وللحديث بقية وأحب أنوه بس لحاجه عن السينيما في اسكندرية إن الإسكندرية قدمت أول عرض للسينما بالشرق الأوسط بعد باريس بحوالي يومين أو ثلاثة واتعرض الفيلم الأول فى الجراند كافيه بباريس وكان اسمه الإخوه لومير وللحديث بقية عن سينيمات اسكندرية.


#الإسكندرية_بالعامية_2
#أنسطاسي #حي_اللبان #الحقانية  #الإسكندرية #البورصة #القهوة_التجارية
#حكاوي_الإسكندرية