محمد سليمان يكتب - بالعامية المصرية عن إسكندرية (٢)وحكاية القرش ساغ
 |
| دكتور محمد سليمان |
قبل ما ندخل في موضوع السينما أو "السيما" في اسكندرية عايز أقول إن بلا فخر الاسكندرنية
همه السبب فى كتابة "قرش صاغ " مع بعض على العملة المصرية فى أوائل إصداراتها .. هتقولي ليه؟ أقولك ليه: الجنيه عبارة عن 100 قرش والاسكندرنية بيقولوا 100 قرش صاغ كلمتين مع بعض واتحولت بعد كده فى العامية الدارجة الاسكندراني إلي "ارساغ" اللي اتحولت ل "ساغ" بعد كده ومفهوم القرش عند الاسكندرنية لما كانوا بيقولوا قرش يعنى بالنسبة لهم نص قرش اللي هيه (التعريفة) يعني مش القرش كامل بمفهوم المحافظات التانية يعني 10 قروش عند الاسكندرية تساوي 5 قروش لو قالوا 10 ساغ او صاغ يعني 10 قروش ..
فمنعنا للاتباس قررت الحكومة انهم يكتبوا قرش صاغ او ساغ علي العملة فالاسكندرنية يقولوا علي القرش "صاغ" وكتبت علي النص جني والربع جنيه 50 او 20 قرش صاغ مش 50 او 25 قرش بس عشان الاسكندرنية فى الوقت ده يحسبوه بالنص على طول فمنعا للاتباس كتبوا قرش صاغ ...
وعلى فكرة إحنا "بنقولوا" على الجنيه "جني" والنطق ده أقرب للنطق الإنجليزي الأصح اللى هوه Guinea اللى سمعناه من الانجليزي وقت الاحتلال ، والجني كانت عملة الانجليز بجانب الجنية الاسترلينى قديماً يعني كده في فرق بين الجني والجنيه الاسترليني وكانت الطبقة الأرسطقراطية الانجليزية بتتعامل بالجني أكتر من الجنيه الاسترلينى British Pound ... وكمان الاسكندرنية بيقولوا على الخمسة ساغ شلن اللي أصلها Shillings بالإنجليزي وكان الجني بيساوي 21 شلن عشان كده ظهر النص والربع جنيه والفكة .. أما الجنيه الاسترلينى فكان بيساوي 20 شلن فعشان كده مكانش فيه إلا واحد جني ونص جني بس من غير الفكه ... يعنى 1Guinea = 1.05 Pound فرق بسيط بينهم ...
وبالمناسبة لو قلت لواحد اسكندرني أنا جاي من طريق الكورنيش "هيعلم عليك" على طول وأوتوماتيك هقولك قصدك ع البحر ... إحنا معندناش "ع الكورنيش عندنا "ع البحر" وكل أفعالنا الماضية مفتوحة يعنى نقول مَشي مش مِشى ولَعب مش لِعب وبنقول على "الأستيكه" جومه اللى أصلها إيطالي زيها زي مستيكه برضوا بالإيطالي مش بنقول لبان وبنقول على الجلاتي "جيلاتا" بالإيطالي برضوا (بالجيم المصرية) .. وكتير من ده ..
وبنتكلموا بصيغة الجمع واعتقد ده راجع لروح الجماعة فى الصيد أو الاحتمال التاني تكون من قبيل التعظيم والروح ديه موجود فى أغلب المدن الساحلية اللى بتشتغل بالصيد تحديداً لأنها بتشعر بتمييز وبقوة التغلب على البحر والمغامرة فيه والأساطير اللى بتنسجها الصيادين عن البحر
#حكاوي_اسكندرية_بالعامية
#إسكندرية_استثناء #لهجة_اسكندراني
#جني #جومه #جنية #الإسكندرية #قرش
تعليقات
إرسال تعليق