حدائق "الشلالات" نسخة من العصور الوسطى على يد أمريكانى

كتبت - علا عبد المنعم محمد حسن :

مافيش حد فينا ماعداش من قدامها او حتي داخلها ...ماحدش فينا مانتبهش
لموقعها المميز واللي موجود في جزء من أرقي احياء الاسكندرية ...بس حد فينا عارف هي ايه قصتها ؟
                                          "الشلالات"
حدائق البلدية ...واللي اتعرفت بعد 1952 "بالشلالات " .الحي اللاتيني في وسط الاسكندرية نقطة تلاقي شارع ابوقير مع السلطان حسين

علي مساحة 8 أفدنة موجودة حديقة من أقدم حدائق الأسكندرية  "الشلالات" عمرها أكثر من 100 سنة صممت في القرن 19
صممها المهندس الامريكي الشهير " فريدريك لواولمستد " واللي اتعرف عنه انه يقدر يحول المساحات المسطحة والأراضي الرملية لأماكن خضراء ومرتفعات فيها تضاريس وهضاب ..

فريديرك صمم الشلالات علي طراز حدائق العصور الوسطي واللي بتاخد شكل مدرجات مرتفعة....وفعلا قسم المساحة لجزئين جزء شرقي وجزء غربي وقسم الجزئين دول ل 3 مدرجات في أعلي نقطى فيهم "شلال"  "موجود من ناحية طريق قناة السويس" الشلال ده اتعمل بنفس فكرة النافورة...الشلال ده بيغذي 3 بحيرات موجدين علي الارتفعين التانين....أكبرالبحيرات دي هي أول بحيرة وهي الرئيسية وكانت معروفة بأسم بحيرة البجع ..يليها بعد كدة بحيرتين أصغر منها حجما...

البحيرات دي جفت للأسف...ومافضلش منهم غير البحيرة الرئيسية واللي بردو قربت تجف وده بسبب ان المواسير المسؤلة عن تغذية الشلال بالمياه  مسدودة وماقيش فيهم غير عين واحدة مفتوحة وطبعا المياه قليلة جدا  ده غير الزبالة اللي سادة مجاري المياه ...
البحيرات زمان كانت بتستخدم للصيد وكمان كان فيها بدلات للتنزه في البحيره

الشلالات مش بس مهمة لكونها أقدم حدائق الاسكندرية ولا علشان موقعها المميز ولا مساحتها ولا حتي النباتات النادرة اللي بتموت حاليا....الشلالات مهمة لانها بتحتوي علي ثلاثة من أقدم واهم اثار الاسكندرية:

1-صهريج المياه....وده أقدم صهريج موجود في الاسكندرية وبيرجع للعصر اليوناني لأ ده هو كمان الصهريج الوحيد الكامل والمحتفظ بشكله لغاية دلوقتي....الصهريج عبارة عن 3 طوابق تحت سطح الارض وده كان واحد من الصهاريج اللي بتغذي الاسكندرية بالمياه العذبة ...مش بس كدة جوا الصهريج فيه مجموعة من اندر تيجان الاعمدة الاثرية ......الصهريج مقفول ومش بيتزار

2-سور الاسكندرية :...وتخديدا الجزء الغربي لاسوار الاسكندرية وده تاني جزء متبقي بعد الجزء اللي موجود في سور الاستاد....السور ده راجع لعصر احمد بن طولون وده جزء من السور الدفاعي اللي كان محاوط الاسكندرية كلها...مش محتاجة أقولكم ان السور في حالة يرثي لها....ده حتي اللوحة اللي بتشرح السور مكسرة ومش هاين عليهم يجددوها

3-طابية النحاسين:...الطابية بناها محمد علي وهي عبارة عن حصن دفاعي للمدينة واتسمت بالنحاسين لان كان فيها مكان بيتم صنع الالات النحاسية الخاصة بالجيش فيه ...الطابية عبارة عن مبني مستطيل من طابقين وله 4 واجهات والمكان مستخدم دلوقتي كمقر لادارة التوثيق الاثري !!!!!....ومكانها بالظبط في نهاية الجزء الشرقي للحديقة جنب مركز شباب الشلالات ....اه نسيت أقولكم ان مركز الشباب مبني علي جزء من ارض الحديقة اصلا

مش بس كدة.....في الجزء الغربي وتحديدا الجزء المواجه لمقر مجلس الدولة القديم
"عند كلية الطب " ...كان فيه تمثال مهم جدا لرئيس نظار مصر " نوبار باشا"..واللي نحته المعماري الشهير "بوش" وكتب علي قاعدة التمثال بالفرنسية " العدل اساس الملك "

التمثال ده بقي راح فين ؟!.....بعد ثورة 1952 التمثال اتنقل واتحظ في مدخل مسرح سيد درويش  مش مشكلة عادي انه يتنقل ..الكارثة انهم نقلوا التمثال من غير القاعدة الاثرية ...والقاعدة فضلت في مكانها لغاية دلوقتي واتحط عليها تمثال كاتمة الاسرار لمحمود مختار  ويارته التمثال الاصلي ده copy منه ولتمثال وقع ومافضلش غير نصه

مؤخرا بقي وبعد أعمال التطوير مع اني ماشوفتش اي تطوير المفروض ان الحديقة اتقسمت الي 5 مناطق وكل منظقة لها اسم علم من اعلام الفن والثقافة في الاسكندرية  وهما
 " سيد درويش ....بيرم التونسي ...يوسف عز الدين عيسي ..احمدعثمان...سيف وانلي "
ده كمان كتر خيرهم أفتتحوا كافتريا علشان الناس تقعد فيها وقاعتين افراح مش شغالين اصلا......مش بس كدة...ده كمان فيه مسرح عظيم جدا العيال بتلعب فيها ..عبارة عن مدرج نص متر  ارتفاعه  ومساحة تشيل 20 كرسي .

اخيرابس ...
بالنسبالي انا وبالنسبة لكل الاسكندرانية ...الشلالات مش مجرد جنينة او مساحة خضراء ولا موقع متميز والسلام...الشلالات بالنسبة لنا تراث شاهد علي عظمة مدينة هي بالنسبة لأهلها من أعظم مدن العالم ...المساحة ممكن تستغل ب 100 طريقة تحافظ عليها  وماتضرش يتراثها...لكن هي هتفضل متسابة كدة مرتع لشرب المخدرات والبلطجية والصيع علشان نصحي في يوم نلاقيهم بيقولولنا انها خطر علي الامن العام وان فيه ثري عربي هياخدها حق انتفاع ويحولها لمنتجع سياحي

ثاني وتالت وعاشر ...الدولة اللي ماتحفظش علي تراثها ..تستاهل ان يكون مكانها في مزابل التاريخ