اسكندرية الكوزموبوليتانية

كتبت - علا عبد المنعم محمد حسن :

الاسكندرية مش بس بأهلها الاسكندرية بسكانها  اللي عاشوا فيها أثروا
فيها وأتأثروا بيها …سابوا في شوارعها بصمة تشهد على تاريخ اتعاش و زمن ساب بصمته في كل ركن فيها


الكوزموبوليتانية اللي بتجمع في مبانيها وطرزها عواصم العالم المختلفة….  في الشتاء وانت بتتمشي في شوارع وسط البلد في الاسكندرية هتحس انك بتتمشي في ايطاليا او اليونان مكان مش في مصر مكان من دنيا تانية  ….وعلشان كده قررت اننا نتكلم عن الطراز المعماري الفريد للاسكندرية

سفارة فرنسا 

 الكورنيش كله وتحديدا من الشاطبي مرورا طبعا بوسط البلد ومبانيها لغاية لما نوصل لبحري ورأِس التين هنلاقي ان المباني والعمارات شكلها مختلف في منها اللي شبه بعض وفي منها اللي واخد طراز فريد من نوعه وتحديدا في محطة الرمل …المنشية وشارع فؤاد…. طيب ليه الاسكندرية مختلفة وليه شكل المباني كمان مختلف ؟

ببساطة كلنا عارفين ان الاسكندرية في الاصل يونانية خططها دينوقراطيس بأمر من الاسكندر الاكبر على طراز المدن اليونانية  "التخطيط الهيبودامي" اللي بيشبه رقعة الشطرنج

مش بس هي مبنية على الطراز اليوناني دي اول جالية سكنت الاسكندرية بعد المصريين هم اليونانيين واللي فضلوا عايشين فيها لغاية نهايات القرن الماضي تقريبا

اتطورت الاسكندرية تطور كبير جدا في العصر اليوناني وعصر البطالمة وكانت وقتها منارة العالم بسبب مكتبة الاسكندرية وده فضل لنهاية عصر كليوبترا السابعة و لغاية لما تحولت لمدينة رومانية بدل ماكنت عاصمة العالم اليوناني…

 في الوقت ده بدأ التطور في الاسكندرية يقل شوية بشوية وفضلت كدة فترة لا بأس بيها حتي بعد دخول العرب وفضلت كدة الي مجئ الحملة الفرنسية ومن هنا بدأ التطور المعماري يظهر  ونلمسه لغاية وقتنا ده

بعد خروج الحملة الفرنسية جزء كبير من الفرنسين وعلماء الحملة فضلوا موجودين في اسكندرية وبالفعل بدأوا يطوروا في عمران المدينة وقاموا بإنشاء مستشفيات ومدارس وكان اشهرها مدارس الراهبات الفرنسيسكان

جيه بعد كده محمد علي واسرته  وتوليه للحكم وبداية عصر الدولة الحديثة واللي كان فيه تطوير شديد جدا بالاسكندرية بعد الاضمحلال اللي كان حاصل لها في العصر الاسلامي والعثماني

محمد علي  واسرته بدأوا يستدعوا المهندسين من جنسيات مختلفة وبدأوا يخططو الميادين  والحدائق والقنصليات واتبعوا في ده فن التخطيط الاوربي ومن اول الميادين انشأت كان ميدان القناصل او ميدان المنشية   واللي اتحط في منتصفه تمثال لمحمد علي علي غرار ميادين اوربا …. وانشأت محطة مصر وحدائق الشلالات …. وعلشان يحافظوا علي تخطيط وتجميل المدينة اتعمل مجلس خاص واتسمى بمجلس الأورناطوا وده شبه الحي عندنا دلوقتي مسئول عن تجميل المدينة

الدومبسكو 

العصر الذهبي للعمارة السكندرية بدأ في منتصف القرن ال 19 وامتد للقرن 20 وتحديدا في عهد عباس الاول
" 1848 – 1854" واللي في عهده بدأ عدد الاجانب يزيد وييجوا يعيشوا في الاسكندرية وبدأت فكرة انشاء الجاليات كاملة في الاسكندرية وكانت اول الجاليات دي هي الجالية اليونانية وبدأوا اليونانين يبنوا مبانيهم علي طراز يوناني كلاسيكي  اتعرف بالطراز الكلاسيكي الحديث واللي بيظهر في بعض المباني في الاسكندرية واللي واجهتها بتاخد شكل "جمالوني "  مثلث زي واجهة المتحف اليوناني الروماني

كانت اكبر جالية بعد الجالية اليونانية في الاسكندرية هي الجالية الايطالية ….  والايطاليين كانوا اكثر ناس وشعب أثر في الاسكندرية ومبانيها ولغاية دلوقتي عمارات وسط البلد شاهدة علي ده ….وكان التطور الاكبر والعصر الذهبي للعمارة قبل الحرب العالمية الثانية

بدأوا المهندسين الايطاليين  يجوا للاسكندرية وكان ابرز المعمارين دول انطونيو لاشاك واللي وصل لكبير مهندسي القصور الخديوية في الوقت ده …..

وكانت ابرز المباني اللي اتبنت علي الطراز المعماري الايطالي "مبني بلازيتا افيون … المبني اللي موجود فيه دلوقتي مكتب الاهرم في شارع فؤاد …. فندق المتروبلتن في محطة الرمل …..القنصلة الايطالية في المنشية  …البنك لاهلي في محطى الرمل …. مدرسة الدومبسكو والمستشفي الايطالي فيلا لوران … مدرسة لوران الثانوية الان…. مدارس فيكتوريا كولدج وال Egc  مبني ادارة الجامعة في الشاطبي ممر وعمارات قهوة علي الهندي فندق سيسل ومعظم المباني اللي حواليه

مش بس كل المباني دي … ده وصل الحال ان المساجد اللي موجودة في الاسكندرية مبنية علي ايد المعماري الايطالي ماريو روسي …. هو اللي صمم وبني مسجد المرسي ابو العباس ومجمع المساجد اللي حواليه  مسجد سيدي جابر ومسجد القائد ابراهيم

مسجد المرسى ابو العباس

ده طبعا بخلاف واجهات المباني والعمارات اللي موجودة في منطقة المنشية ومحطة الرمل واللي واجهتها كلها علي الطراز الايطالي واللي كان نموذج لاحياء طراز الباروك والعمارة القوطية الايطالية "طراز عصر النهضة "

ولو لاحظنا هنلاقي ان معظم المباني دي مظهرها ايطالي شرقي مطلية بالون الاصفر والوردي وان نوافذها علي الطراز الاوربي علشان تجمع بين ثفاقة البحر المتوسط والحضارة الاوربية

ده مش بس كدة ده احنا بنستخدم لغاية دلوقتي بعض الكلمات المعمارية اليطالية زي " بلكونة وفرندة " ….

المؤرخين قالوا عن الاسكندرية انها علي الطراز اليوناني الممزوج بالفن الايطالي المعماري "اللفورنسي " وقال عنها بارتسي انها مدينة نصف أوربية ميدانها الكبير "المنشية " اشبه بميادين فرنسا

مدينة زي الاسكندرية قطعة من اوربا في الشرق بتجمع اكتر من 1500 مبني مدرج انه تراث العدد ده  صعب انه يكون موجود في اي مدينة تانية… بتطل علي البحر المتوسط جواها في الشتاء أروع من الصيف أهلها ليهم رونق وطابع خاص مالهوش مثيل في اي مدينة او محافظة تانية …. مدينة زي دي في اي مكان في العالم كانت تتحول لمتحف أثري وتراثي مفتوح يصرف علي البلد كلها ….لكن احنا بدل مانحافظ علي التراث المعماري الفريد من نوعه ده لأ بنهده ونبني مكانه كتل خرسانية لا ليها شكل ولا لون ولا طابع …..زي اللي بيحصل دلوقتي بالظبط في قصر عزيزة فهمي واللي بيحصل في عمارة راقودة في الشاطبي وزي اللي حصل في فيلا شيكرويل وأجيون وامبرون وغيرها كتير
ثاني وتالت وعاشر هفضل أقول ان البلد اللي ماتحترمش تارثها يبقي مكانها مزابل التاريخ.....