المنشية من العصر البطلمى إلى محمد على

كتبت علا عبد المنعم محمد حسن :

هي مرتبطة مع كل واحد فينا بذكري …..من واحنا عيال وهي بالنسبة لنا لبس العيد ماحدش فينا مابيعديش عليها ولا حد فينا ماركبش منها علشان يروح لاي مكان في الاسكندرية….. اكبر ميادين الاسكندرية  وأشهرها
واقدمها
 فسحة الناس الطيبة والعيال اللي ماسكة كياس الهدوم الجديدة ….. "المنشية "
الميدان الكبير …. او ميدان محمد علي …. ميدان القناصل او ميدان السلاح….  او الاسم الاشهر علي الاطلاق "المنشية "

هي أكبر واقدم ميادين الاسكندرية انشأه محمد علي سنة 1830 علشان يكون مركز المدينة التجاري

طيب الميدان قبل عهد محمد علي كان ايه؟
هنرجع بالزمن شوية وتحديدا في العصر البطلمي كانت المنطقة دي امتداد طبيعي للبحر يعني كانت عبارة عن بحر…بعد كدة بشوية انحصر البحر عنها واتردمت ….ووصفها الجغرافي "سترابون" انها مساحة كبيرة بها مخازن واماكن لبناء السفن

نمشي بالزمن شوية لغاية لما نوصل ل علي باشا ومبارك واللي كتبه في كتابه الخطط التوفيقية بيقول  ان الارض دي ايام العرب كانت عبارة عن ارض مفتوحة كان بيستخدها البدو كسوق للماشية وعلشان يبعوا فيه بضاعتهم من تمر وصوف

ولما جت الحملة الفرنسية 1798 الفرنسين استخدموا المساحة المفتوحة  علشان تكون مكان لأستعرا ض قوات الحملة والعروض العسكرية وتخزين السلاح ومن هنا بدأ تتعرف ب "ميدان السلاح"

الساحة دي بدأت تلفت نظر محمد علي لما فرنسا  طلبت قطعة أرض علشان تبني عليها قنصلية وهنا قرر محمد علي انه انه يخطط ميدان في المنطقة دي عام 1830 وأول حاجة اتبنت في المنطقة كانت القنصلة الفرنسية عام1832 اللي موجودة في مكانها لغاية دلوقتي "ع الكورنيش"

قرر محمد علي انه يخطط الميدان علي طراز الميادين الاوربية و أوكل التخطيط للمعماري الايطالي "فرانشيسكو مانشيستي "واللي جيه من اسمه اسم "المنشية "

انشأ الميدان واتخطط علي غرار ميادين ايطاليا طول الميدان 420 متر وعرضه 65 متر محاط  بالمباني من جميع الجهات اللي اخدت شكل مستطيل مكون من 3 او 4 طوابق يشبه مبني ايطاليا  وكانت المباني ذات طبع ايطالي شرقي
وفي وسط الميدان كان فيه مسلة صغيرة من الالباستر وعلي الطرف الاخر نافورة

سنة 1842 اتبنت الكنيسة الانجلية "كنيسة سان مارك" واللي بتعتبر من الكنايس الفريدة من نوعها علشان بتجمع بين الزخارف اليهودية ولمسيحية والاسلامية مع بعض …ووقتها وفي عهد الخديو عباس حلمي الاول اتحولت النافورة اللي في طرف الميدان لقصر فخم جدا اشتراها بعد كدة الخواجة انطاونيادس لمقر لبورصة القطن

في عهد الخديو اسماعيل كان الميدان في كاامل تألقه تم تشجير الميدان بشجر السنط وتم وضع كشك لعزف الموسيقي وانشئت المحاكم المختلطة "سراي الحقانية الان" وتم وضع تمثال محمد علي واللي اتنحت مخصوص علشان يتحط في الميدان

وفضل الميدان متألق الي ان حدثت الكارثة عام 1882 وتم قصف الاسكندرية وقصف الميدان بالكامل علي ايد الانجليز وماتبقاش منه غيرمبني البورصة وكنيسة سان مارك
وقتها بدأت الحكومة تعوض الملاك اللي كان معظمهم من الاجانب وبدأ تعمير الميدان بالكامل اللي شهد عصره الذهبي من عام 1883 الي 1914….. بدأت البلاد الاوربية انشاء قناصلها في الميدان….علشان كدة الميدان اتعرف بميدان القناصل….كمان بدأ انشاء الوكالات التجارية والبنوك وانشاء الطريق اللي ربط الكورنيش بالميدان عام 1905 وانشاء خطوط الترام عام 1907

الميدان كان مركز تجاري هام جدا  وروعة في الجمال زي ميادين ايطاليا واوربا  وكانت من اشهر العائلات التجارية اللي سكنت الميدان عائلات اجيون ومنشا وسرقس وسالفاجو وفضل كدة لعام 1952 ولبعد ثورة يوليو

بعد ثورة يوليو بدأ ازالة الحي السكني جنوب الميدان وانشأ مكانه شارع النصر علشان يربط بين الميدان والميناء وانشأت الاسواق لكن للاسف ماكنتش متخططة بشكل جيد زي سوق سوريا اللي معروف دلوقتي بسوق لبيا

مش بس كدة اتحول مبني بورصة القطن لمقر الاتحاد الاشتراكي اللي خطب عليه عبد الناصر خطاب التأميم في 1954 واتحول بعد كدة لمقر الحزب الوطني …اتحرق المبني سنة 1971 في انتفاضة الخبز واتهدم كله واتحول لجراج في عهد مبارك

العشوائية اللي طالت الميدان بعد 1952 مش بس وقفت لغاية كدة لأ ده علي طرف الميدان وفي مواجهة القنصلية الايطالية والفرنسية هنلاقي مبني ضخم مكون من 21 دور اتبني في الثمنينات علشان يكون مبني تجاري ع غرار مبني البنتاجون واتسمي ببرج قصر القطن ده كمان الدولة استلفت فلوس من ايطاليا تقدر بالميارات علشان تكمل بنائه ….المبني زي مااحنا عارفين فاضي مافيهوش غير جامعة سنجور اللي اخدت 3 ادوار فقط من المبني وفيه جزء اتحول لجرج والباقي بيربوا فيه عفاريت !!!

كلنا عارفين شكل المبني دلوقتي عامل ازاي وعارفين شكل الميدان عامل ازاي  ان مش هقول غير حاجة واحدة بس اننا اساتذة في تحويل الجمال لقبح بشع واهدار مليارات الجنيهات علي ولا حاجة …او بس علشان يسرقوا نصها

ملحوظة
علشان اللي متلغبط في تخطيط الميدان :
وسط الميدان فيه تمثال محمد علي  …علي اليمين واحن بصين للتمثال هنلاقي الحقانية اللي كانت مبني المحاكم المختلطة وعلي الشمال كنيسة سان مارك..وفي نهاية الميدان كانت بورصة القطن واللي هو دلوقتي جراج
الامتداد من تمثال محمد علي للجندي المجهولوالكورنيش ده امتداد الميدان عام 1905 القنصلة الفرنسية والايطالية موجدين في مكانهم لغاية دلوفتي علي الكورنيش
في بوست سابق عن شرح ازاي الجندي المجهول كان مكان لتمثال محمد علي