محمد سليمان يكتب .. إنفد بجلدك الساعة 12 فى إسكندرية
لو كنت في اسكندرية في راس السنة وجت الساعة 12
وانت ماشي فى الشارع حاول تنفد بجلدك لأنك هتلاقي أطباق بتكسر فوق دماغك .
عادة الإسكندرانية فى راس السنة بيرموا الأطباق من البلكونات ابتهاجاً بالعام الجديد .
وفى الحقيقة العادة ديه وخدنها من اليونان لأن كتير من الجالية اليونانية بطبيعة الحال نزلو اسكندرية وعاشوا فيها وصدروا لينا العادة دية ولغاية دلوقت والظاهرة ديه كانت واضحه أوي فى السبعينات والتمنينات يمكن قلت شوية الأيام ديه .
وأغلب الجاليات الأجنبية كانت ساكنه فى منطقة الابراهيمية والشاطبي وأيضاً فى العطارين فى شارع صلاح الدين وشارع أبو الدرداء حتى هتلاقي فى المنطقة ديه مدارس أجنبية كتير كانت للجاليات اللى عايشه فى المنطقة زي الدون بوسكو (معهد إيطالي) اللى فى منطقة البياصه واسم البياصه جاي من الكلمة الايطالية (piazza) يعنى الميدان أو المربع فتحولت من بياتسا إلى #البياصه .
وتلاقي كمان غير الطلاينة والجريج الأرمن كانوا موجدين هناك ومن المدارس برضوا اللى هناك سان شارل بورميه الألماني وهتلاقي برضوا مدرسة سان فنسان دي بول الفرنساوي وعلى امتداد شارع صلاح الدين هتلاقي كمان مدرسة سانت كاترين اللى هيه قدام #الكاتدرائية_الأرثوذكسية .
وهتلاقي طبعا شارع فؤاد متقاطع مع ش صلاح الدين وفيه الغرفة التجارية اليونانية وشارع فؤاد بقا ده أقدم شوارع الإسكندرية ويمكن مصر كمان أقدم من شارع المعز بكتير .
ومعظم مباني شارع فؤاد هتلاقيها بالطراز اليوناني الممزوج بالفن الإيطالي المعماري (الفلورنسي) بالمناسبة ش فؤاد بيتقاطع مع ش النبي دانيال وهو نفس التقاطع الرئيسي لمدينة الإسكندرية القديمة واللى عمله المهندس دينوقراطيس بنظام رقعة الشطرنج وده تصميم كان شائع في تخطيط المدن الإغريقية، الكلام ده بقا إمتي ؟
تخيل فى القرن الرابع قبل ميلاد المسيح يعنى شارع فؤاد مع النبي دنيال بقاله أكتر من 2400 سنة تقريباً ...
طولت عليكم كل سنة وانتم طيبين وعام جديد سعيد عليكم يا رب
تعليقات
إرسال تعليق