محمد سليمان يكتب - بالعامية المصرية عن إسكندرية

دكتور محمد سليمان 

فى قلب الإسكندرية هتلاقي شارع اسمه السبع بنات بالمنشية الشارع ده
ماسك من أول مينا البصل "نهاية شارع الخديوي" لغاية ميدان المنشية أو ميدان القناصل واللى كان من أهم التجمعات للتجار اليونان والإنجليز واليهود أيضاً ... والسبع بنات بتمشي فيه "الترماي" الصفره اللى كان زمان بيسموها الكهربا والشارع ده كله تفريعات بتوديك إلى أعرق حارات ومناطق اسكندرية وأشهرها طبعا اللبان والفرهده وسوق السنوسي وشارع عبد المنعم والمينا وتفرعات توديك الباب الأخضر وكوم الناضورة وغيرها من الشوارع والحارات اللى كانت منتشره فيها المخابئ تحت الأرض اللى بعضها كانت موجوده لوقت قريب أوي وأنا شفتها بنفسي وكنت بستغرب إني وانا ماشي فيها ألاقي ماسوره طالعه من الأرض وسط الشارع على شكل حرف تي مفرغة فعرفت إنها كانت لزوم دخول الهواء لهذه المخابئ تحت الأرض ... وكان كمان بيبنوا حائط ضخم أما أبواب البيوت عشان القنابل والشظايا ما تدخلش فى البيوت أو زي ما كانوا بيقولوا زمان متدخلش فى "بير السلم" وبعض البيوت لوقت قريب من خمسة وعشرين سنه مثلا لازالت تحتفظ بهذه الحوائط أو الصدادات ومن الملاحظ أيضا إن الناس كانوا بيحطو على إزاز الشبابيك جلاد غامق وتحديدا أزرق غامق عشان ميبينش النور اللى طالع من الشقق فى الغارات الجوية وانتهت الحرب وبقت عادة فى البيوت القديمة من أيام الحرب ....

شارع السبع بنات أصلا المفروض يتسمي السبع راهبات عشان زمان الشارع ده كان ضلمة باستمرار وانتشرت فيه عمليات الخطف أيام ريا وسكينة عشان كانت ريا وسكينة ساكنين قريب منه وكان طريقهم لزنقة الستات فكان هناك فى دير للراهبات قريب من شارع السبع وكانوا بالليل يطلعوا ينوروا الطريق للناس عشان كده اتسمي باسمهم وسموه السبع بنات ..

ولغاية دلوقت في عيادة باسمهم ومشهورة بتنظيف الودان حتى لما واحد كانت ودانه تتسد يقولك روح السبع بنات والمستوصف ده دلوقت فى شارع عبد المنعم إسماعيل مهنا حالياً اللى أوله منطقة الفرهده ظهر مدرسة سان فان دي بول فى الشارع المؤدي للمعهد الإيطالي الدن بوسكو وفيه ضريح أبو الدرداء فى منتصف الشارع وده ليه حكايه ظريفة هبقا أحكيها فى بوست تاني ..

شارع السبع بنات قديما

المهم  كان بيت ريا وسكينة تحديدا جنب كراكون اللبان اللى هوه دلوقت تقريبا فى النص الأول من شارع السبع بنات عند الفرن الألي دلوقت ده لو وشك للبحر هيبقا على إيدك اليمين قرب جامع إسمه سيدي عماد موازي ليه بالمناسبة سيدي عماد هو سيدي عماد الدين بن محمد بن إسحاق بن محمد بن المرتضي البلبيسي مسك  قضاء الإسكندرية أيام الملك الناصر مُحَمَّد بْن قلاوون , وكانت محنته أن  طُلب منه أخذ أموال الأيتام للسلطان , فامتنع فعزل وديه معلومه موجوده فى كتاب اسمه مختصر أعلام الشاذلية وكمان الأعلام بس قليل من الناس همه اللى عارفين إن هو ده سيدي عماد الدين، وطبعا كلنا عارفين حركة التصوف اللى ظهرت فى اسكندرية وهتكلم عنها فى بوست تاني هتناول فيها أهم العارفين بالإسكندرية وليه اسكندرية تحديداً منهم البوصيري والمرسي والشاطبي وسيدي بشر وسيدي جابر والأنصاري والزهري والقاضي سند وياقوت العرش ودايما جدتي كانت بتقول لي إن جد جدي اتسمي ياقوت لأنه كان من المجاورين ومن خدام ياقوت العرش وينسب إليه المهم نرجع لمرجوعنا .. من ذكرياتي مع سيدي عماد إن المأذنه وهمه بيجددوا المسجد طلعت مايله شويه والعامة من الناس قالوا السبب إن سيدي عماد مش راضي عنها لأنها اتبنت على مقامه وفضلت على كده غير مكتمله على ما أذكر لأواخر التمنينات أو أول التسعينات لمدة ما بين هل ينقلوا المقام أو يغيروا مكان المأذنة لغاية ما أعادو بالبناء على شكل صحيح وكان المقام مجاور لبيت ريا وسكينة وبيتهم كان فى شارع اسمه على بيه الكبير موازي تقريباً لشارع سيدي عماد وكان من عادة الوافدين على اسكندرية من القري مجاورة أولياء الله الصالحين للتبرك وأيضا كان هناك كنيسه لا تزال موجوده حتى الأن وكان فى حلواني هناك اسمه نبيل بس اعتقد انه اتشال فى نفس شارع بيت ريا واسكينة  وكان فيه برضوا مصنع بسطرمه مشهور اعتقد أن صاحبه كان  واحد يوناني ..

منزل ريا وسكينة 

وشارع السبع بنات دلوقت من أكثر الأماكن اللى بيتواجد فيها معدات الكهربا و زمان كان كله مطابع ومحلات لبيع أدوات الطباعة وكان فى خمارات وبيوت للبغاء كتيرة بحكم أنه كان قريب من الميناء اللي هيه ميناء البصل ومن الناحية التانيه عند ميدان القناصل اللى هو ميدان المنشية أكبر تجمع للجالية اليونانية والإنجليزية واليهود العاملين فى تجارة الأدوات الكهربية. شارع السبع بنات فى حي اللبان أو بشكل أدق ابن اللبان نسبة سيدي  شمس الدين محمد بن أحمد بن عبد المؤمن بن اللبان الأسعردي، وهو سوري الأصل من دمشق  وأول من سكن بهذا الحي وكان مصاحب لسيدي ياقوت العرش اللى هومن أصحاب أَبو العباس المرسي  صاحب سيدي أَبِي الْحَسَن الشاذلي.
طولت عليكم معلش وللحديثة بقية فى بوستات جاية.
#الإسكندرية_بالعامية
#السبع_بنات
#سيدي_عماد
#ياقوت_العرش
#اللبان
#حكاوي_اسكندرية