أشهر حكاوى عن ٣ قهاوى فى مدينة الرب "الأسكندرية "

البورصة التجارية

كتبت - علا عبد المنعم محمد حسن :

- ماحدش فينا مايعرفش اشهر قهاوي الاسكندرية .. بس حد فينا عارف هي ايه حكاوي القهاوي دي !!


اشهر حكاوي عن اشهر 3 قهاوي في مدينة الرب "الإسكندرية"

1-البورصة التجارية.
الكورنيش .. المنشية
تاريخ تأسيس القهوة راجع لسنة 1890 أنشأت القهوة مع العمارة اللي موجودة فوق القهوة علي ايد مهندس انجليزي

اتعرفت من وقت نشأتها باسم التجارية بسبب تجار القطن اللي كانت معاملتهم بتم علي القهوة دى بالتحديد ..

مساحة القهوة 600 متر متقسمة الي 3 اقسام وكل قسم كان لفئة معينة...... الجزء الأساسي كان للادباء والمثقفين والطبقة الوسطي  وده اللي كان بيطل علي الكورنيش والاوسط للاصدقاء والمدخنين وهواة اللعب اما الجزء الخلفي واللي معروف دلوقتي بالممر كان للنشطاء السياسين.

القهوة من يومها وهي شاهدة علي كل احداث  اللبلد بداية من المظاهرات المعادية للانجليز لغاية مظاهرات 25 يناير واجتماعات أعضاء الوطنية لتتغير القهوة أتكلم عنها الاديب ادوارد الخراط ووصفها بانها قهوة المثقفين واليسارين.

وفي السيتنات من القرن الماضي كان في ندوة بتعقد فيها بصفة دورية لادباء الإسكندرية  كانت معروقة بندوة "ادباء الطليعة " وكان مؤسسها الاديب السكندري محمد حافظ رجب وكان بيتقدم فيها القصص والاشعار والدراسات النقدية.
مش بس كدة القهوة اشتهرت ب راجل كان اسمه عم " محمد" وشهرته تمباخكي وده راجع للتمباك اللى كان بيبعه وكان من ارقي انوع الدخان في الوقت ده ..
القهوة مشهورة برخامها العتيق وخشبها الصلب ولكن للأسف مغظم التجاليد الخشبية دي  استبدلت بألواح من االخشب شهالصناعي.

2-قهوة فاروق :
بحري .... شارع إسماعيل صبري
عمر القهوة حوالي 82 سنة., القهوة كانت ملك لسيدة يونانية
اسمها "ماري ليوناتي " وكانت القهوة معروفة باسم  "كالميرا" وتعني صباح الخير باليونانية.

 في سنة 1938 وتحديدا مع بدايات تولي الملك فاروق للعرش كان معدي بموكبة لقصر رأس التين ....أعترضت ماري موكبه  علشان تعبر له عن شدة حبها وتأيده له  حاول الحرس الملكي انه يمنهعها ولكنها أصرت انها تكلم الملك فاروق وبالفعل سمح لها فاروق ولما قربت من عربيته طلبت منه انه يشرب شاي في قهوتها ووافق الملك وطلب كمان مع الشاي انه يدخن الشيشة ..

ومشي الملك ولكنه أغدق علي ماري مبلغ مالي كبير جدا مكفأة ليها علي حسن ضيافتها.....
ماري قررت انها تصنع من الهدية تيجان نحاس منقوش عليها اسم فاروق وحرف "F" ووضعتها علي مدخل القهوة وعلي الأبواب وغيرت اسمها لقهوة فاروق

وفضلت القهوة محتفظة بالاسم بعد ثورة 1952 وبعد انتقال ملكيتها للمصرين ولغاية دلوقتي باسم قهوة فاروق  وفضلت صور الملك فاروق والتيجان علي حوائط القهوة .

3-قهوة علي الهندي :
المنشية.....
القهوة تاريخ تأسيسها بيرجع لبعد عام 1882 لما بدأ يتم انشاء مجموعة من المباني علي شكل الطراز الإيطالي  ... اتعرفت المباني دي باسم وكالة " أمفراتو " ومعناها الكهف  باللغة الإيطالية  ... واتسمت بعد كدة بالوكالة لقربها من المركز التجاري "المنشية"

القهوة كانت ملك لسيدة يونانية اسمها "ماريا خرتيوباس" وكانت مشاركة "علي الهندي" واللي اشتري منها القهوة بعد كدة وفضلت محتفظة بأسمه لغاية دلوقتي.

القهوة اتعرفت في التسعينات باسم "خبيني" والاسم معروف لغاية دلوقتي للسياسين والثورجية .... واتسمت بكدة بسبب ان مكان القهوة مش متشاف  من الشارع الرئيس هي بتطل ع الشارع من 3 ممرات وحتي الممرات دي مش متشافة بسهولة واللي بيروحها يعرف ده .

مش بس كدة القهوة كمان كانت بتستخدم كمخبأ للناس في الحرب العالمية الاولي والتانية ..
اشهر حاجة في  المكان هو الشخشيخة الزجاجية اللي رابطة 3 عمارات علي الطراز الإيطالي ببعضها وده المكان اللي ظهر في مشهد العزاء الشهير في فيلم ملاكي الإسكندرية بتاع احمد عز

في الاخر ماحدش فينا ماعداش عليهم………وماحدش فينا ماقعدش علي واحدة منهم ……  جدرانهم شايلة حكايات اتحكت وحكايات بتتحكي…. تاريخ واحلام ضحك ودموع شاهدة علي سنين عمرنا اللي فاتت وبتشهد وهتشهد ع سنينا اللي جاية …..مافيش حد فينا كان مفلس ولقي المكان حضه…..

وزي ماحمزة نمرة قال القهوة عشرة وجيرة ومشاريب ع الحساب او فضفضة من القلب بين اتنين صحاب <3 p="">