أقدم شارع في العالم .. شارع فؤاد في الاسكندرية

عندنا في مصر حاجات كتير أوي كنا احنا أقدم و أول ناس فيها ، أول طبيب ،
أول كميائي ، أول اللي حسبوا الزمن ، ، أول من زرع ، أقدم ترعة ومصرف وساقية .

من ضمن الأقدم بردو عندنا هو ان عندنا أقدم شارع على وجه الأرض !!
أه بجد زي ما بقولكوا كده أقدم شارع على وجه الأرض بيمر على أرض مصر ، وتحديدا في إسكندرية .
فيه شوارع كتير قديمة لكن الشارع ده بالأخص لسه في نفس مكانه ومحتفظ بأغلب تفاصيله اللي تم انشاؤه عليها ، وبالإضافة لإنه لسه شغال وحيوي زي ما كان طول عمره حد خمن اسم الشارع ؟؟ لأ مش الكورنيش !!! هااا ؟؟
طب أقولكم أنا ، بنتكلم عن شارع فؤاد شارع فؤاد أقدم شارع قائم و مستغل في العالم حتى الان .
الشارع أنشيء في العصر البطلمي وكان اسمه ( الطريق الكانوبي) لأنه كان مصفوف كله من أوله لأخره بالأعمدة الرخامية.

وكان هو الشارع الرئيسي في اسكندرية اللي بتتعامد عليه باقي الشوارع ، زي شارع النبي دانيال والسلطان حسين . فيتكون التصميم الشطرنجي المميز للمدن الاغريقية.

مباني شارع فؤاد كلها مباني كلاسيكية تتميز بالمزج بين الطرز الرومانية واليونانية والايطالية والفرنسية و طراز الباروك حاجة كده معرض مفتوح للعمارة الكلاسيكية .

شارع فؤاد هو قلب (وسط البلد) في اسكندرية ومركز الحركة الفنية والثقافية ، بطبيعة الحال زي كل مناطق وسط البلد في المدن الكبرى والعواصم القديمة هتلاقي أغلب مثقفي الاسكندرية سكنوا شارع فؤاد، زي الشاعر اليوناني (كفافيس) كمان أقدم دور السينما بنلاقيها في الشارع زي  بلازا ورويال اللي بناها آل قرداحي اللبنانيين، وأمير وسينما ريو،اللي كانوا مطعم لواحد من التجار الاتراك.

مبنى أوبرا اسكندرية موجود في نص الشارع تقريبا وزمان كان اسمها (تياترو محمد علي).

على بعد 200 متر من الأوبرا بنلاقي قصر ثقافة الحرية اللي كان أكبر نادي في مصر لوجهاء المجتمع السكندري (كلوب محمد علي) اللي كان مركز التقاء عمد الجاليات الأجانبية ، وكبار التجار و أكبر صفقات تجارية في مصر كانت بتعقد فيه .

على بعد 20 متر من الكلوب بنلاقي نقطة شريف واللي بتعتبر واحد من أقدم أقسام الشرطة في مصر كلها ، وكانت في السابق مركز للحراسة البريطانية.

في الثلث الأخير للشارع بنلاقي متحف اسكندرية القومي، اللي كان مقر للقنصلية الامريكية واشترته وزارة الثقافة وحولته لمتحف، بيضم مجموعة كبيرة من الاثار الغارقة وبيكمل مجموعة المتحف اليوناني الروماني.
وأخيرا بينتهي بساعة الزهور وحديقة الشلالات ، اللي بيعتبروا من التحف النباتية النادرة والفريدة جدا في العام كله.
دول كتير شهرة السياحة فيها قايمة على شارع واحد زي شارع فؤاد أه وربنا زي مابقولكوا كده كتير من اللي راحوا تركيا ، بيلاقوا نفسهم كل اللي بيتفرجوا عليه شوارع قديمة فيها كام مبنى كلاسيكي بس الصراحة بقي حبة دعاية مع كام صور على غسلة حلوة للشوارع والمباني وحبة اضاءة محترمة ومدروسة، وان الله يحب المحسنين هي كده ودخل يا عم مليارات من السياحة.
بينما هنا إيد الاهمال عمالة تحش لا مخلية غالي ورلا رخيص في سكتها قولنا وبنقول وهنفضل نقول ، كنوز بلدنا قدام عنينا ، حدش عايز كنوز يستغلها يا جدعان؟؟! مش عاوز كنوز يا عم ؟؟ كنوز أهي يا أستاذ !!

#زى_مبقولك_كده مع #اسعاد_يونس
Esaad Younis- إسعاد يونس