زنقة الستات"خان خليلى "الأسكندرية

كتبت -علا عبد المنعم محمد حسن :

الأسكندرية مش بس ببحرها وجواها ولا بس بأهلها اللي ليهم طابع ولون مختلف عن بر مصر كله …


الاسكندرية فيها حاجات كتير مستخبية مدارية ورا جدران الزمن وقلوب الناس الطيبة……
ومن الحاجات دي الأماكن اللي لما بتمشي فيها بتحسسك بسعادة وفرحة وحنين مش بيجلنا غير واحنا بنقرب لها  ومن أجمل الأماكن دي هي "زنقة الستات "

زنقة الستات خان الخليلي الاسكندرية …..واحد من أشهر اسواق الاسكندرية ان لم يكن أشهرها علي الاطلاق … يشبه في تصميميه الاسواق العربية بدكاكينه اللي بتترص جنب بعضها

لو انت مش اسكندراني او لو حتي مش معاك حد من الاسكندرية  صعب أنك توصل  للزنقة لوحدك علشان السوق زي المتاهة ممكن تدخل له او تخرج منه من كذا مكان …. وزي مابيقولوا كل الطرق تؤدي الي روما  بردو كل الطرق في المنشية  بتوصلك لزنقة الستات  ومن اشهر المداخل دي شارع فرنسا

بالنسبة لتاريخ المكان  ماحدش اختلف ان عمره بيزيد عن 100 سنة وانه من اقدم اسواق الاسكندرية لكنهم أختلفوا علي تاريخ النشأة نفسه…..


بعض المؤرخين بيقولوا ن السوق راجع لعهد الدولة الفاطمية وهجرة المغاربة لمصر …..وناس تانية بتقول انه بيرجع الي انهيار دول الاندلس وبردو توافد أعداد كتير من المغاربة للاسكندرية واستوطانهم بيها …ومؤرخين تانين بيقولوا انه راجع للحملة الفرنسية لان المكان ده وتحديدا شارع فرنسا كان بيستخدم كمستوطنات للجنود الفرنسين  ومن هنا بدأ البايعين يتمركزوا حوالين الجنود ….وفيه مؤرخين تانين قالوا انه راجع لعهد محمد علي وانشاء ميدان المنشية

لكن أغلب الظن ان السوق بدأ تكوينه بعد عام 1882 وتحديدا بعد ضرب المنشية علي ايد الانجليز  وبدأ ان الجاليات المختلفة تيجي تعيش في الاسكندرية…..لكن اللي احنا متأكدين منه ان الزنقة أخدت شكلها اللي عليه دلوقتي في اوائل القرن ال 20

الزنقة كانت بتضم كل طوائف التجار من المغرب وسوريا وليبيا علشان كدة هنلاقي ان السوق اتعرف في بعض الأحيان بسوق ليبيا وفي احيان تانية بسوق المغاربة …..  لكن اشهر الاسماء هو زنقة الستات وفيه مصادر بتقول ان الاسم ده جيه من اسم تاجر اقمشة مشهور جدا مغربي الاصل كان اسمه "ستتيت زنيقة" ومعناها بالمغربي شارع  واتحرفت لزنقة الستات لكن المعلومة مشكوك في صحتها واغلب الظن انه اتسمي بزنقة الستات بسبب الشوارع والممرات الضيقة اللي فيها المحلات اللي فعلا زنقة ولان كل رواد السوق من الستات

زمان زنقة الستات كان اللي بيشتري منها مش بس الناس العادية لا ده كان فيه محلات بيجلها الأميرات والفنانين  مخصوص

وكان للزنقة شخص بيتسمي شهبندر التجار ده كن أكبر التجار اللي كان بيحدد الأسعار  وبيحل الخلافات اللي بين التجار وبعضهم…وكانوا بيتجمعوا علشان يعملوا الجلسات دي في محل من محلات القماش الكبيرة واللي كان معروف باسم البت الابيض ومع مرور الزمن اتحول لمركز لجلسات التجار بس للاسف اختفي دلوقتي

جوا الزنقة وحواليها فيه حوالي 50 بيت أثري وكمان فيه مسجد الجوربجي وتربانة والخراطين واللي بعتبروا مساجد أثرية لكن للاسف السوق نفسه مش مدرج علي انه اثر او حتي تراث

نسيت اقولكم ان الزنقة اكتسبت شهرتها الكبيرة بعد حوادث رايا وسكينة اللي روج لها الأعلام وكان بيقال انها كان بتم من سوق الزنقة

في الاخر الزنقة مش مجرد سوق فيه كل حاجة……الزنقة بشوارعها الضيقة مكان شاهد علي تاريخ مدينة وناس بسيطة بيلاقوا بهجتهم في الالوان المرصوصة جنب بعضها علي محالتها
بعيد عن كل المسخ اللي المدينة بتتحول له ….."حقيقي لسه الأسكندرية قادرة انها تسعدك "