كتبت - علا عبد المنعم محمد حسن :
واقف في أخر مكان في اخر حتة في الإسكندرية القديمة…..بنبص عليه من بعيد …لكن عمرنا ماقربنا ……
أكتر من 100 سنة وهو بيبص على البحر …وطول عمره رمز للسلطة والحكم….حتي لما قامت الثورة القديمة والحديثة في مصر "لو صح التعبير" كان أخر مكان شاهد علي نظام بائد وعلي عهد ولى وكأنه مكتوب عليه يسجل زوال الحكومات ……
قصر رأس التين
واحد من أقدم قصور مصر …اتبني في عهد محمد علي علي ايد المهندس الفرنسي سيرزي سنة 1834 واللي استمر بنائه 11 سنة علشان يفتتح رسميا عام 1847
سمي بقصر رأس التين لان الأرض اللي مبني عليها القصر كانت عبارة عن أرض مزروعة بشجر التين وعلشان كدة اتسمي برأس التين
القصر القديم اللي بناه محمد علي كان علي شكل حصن "تيمنا بقلعة الجبل " لكن القصر ده مافضلش منه غير الباب الشرقي اللي بيتكون من 6 أعمدة جرانتية تعلوها تيجان مصرية وفيها زخارف لآيات قرآنية وكلمات مـأثورة كجملة " العدل أساس الملك" بالإضافة لاسم محمد علي وسنة 1262
طيب القصر اللي موجود دلوقتي مين اللي بناه ؟ ….
مبني القصر اللي موجود حاليا بناه الملك فؤاد الاول علي ايد المهندس الايطالي فيروشي والمهندس المصري حسن باشا واتبني علي الطراز الأوروبي وهو مشابه تماما لقصر عابدين لكنه أصغر منه مساحة واتكلف بنائه وقتها 400 الف جنيه مصري
القصر بيتكون من قبو ودور ارضي ودور علوي بيحتوي علي صالون وقاعة العرش وقاعة للموسيقي وقاعة للولائم وقاعة للاستقبال بالاضافة للحرملك وغرفة نوم الملك
اما القبو فيه صالة مستديرة متصلة بسلم بتوصل لمرسي يخت المحروسة
كل حجرات القصر فيها نقوش من الذهب الخالص بخلاف اللوحات الفنية والزجاج الملون اللي رسمهم أِشهر فنانين في العالم…ده غير ان معظم الأثاث من فرنسا
القصر مطل علي حديقة مساحتها 16 فدان وكانت النباتات بتجيلها مخصوص من هولندا …ده كمان كان فيه صالة مغطاة بالزجاج فيها حمام سباحة ….ده غير محطة السكة الحديد اللي موجودة بداخل حديقة القصر
القصر فخامته وعظمته مش بس في تصميمه ولا في زخارفه ونقوشه لكنه كمان في الاحداث اللي كان شاهد عليها
بداية من محمد علي نفسه مرورا بانه اول قصر دخل فيه التليفون عام 1879 وان قافلة كسوة الكعبة كانت بتطلع منه وانه اتحول في عهد الخديوي اسماعيل لمقر الحكم الصيفي مش بس كده ده كان شاهد علي خلع الخديوي اسماعيل…..
و كمان نهاية حكم الاسرة العلوية اللي استمرت 147 سنة وانتهت بتنازل ورحيل فاروق عن العرش ومغادرته مصر من رأٍس التين عام 1952 علي متن يخت المحروسة ……
ده مش بس شاهد علي التاريخ البعيد…ده كمان شاهد علي التاريخ القريب لما المتظاهرين قرروا انهم يتوجهوا يوم 11فبراير 2011 "يوم التنحي" لقصر رأس التين كرمز من رموز الحكم ….
وكأن فعلا القصر مكتوب عليه انه طول الوقت يكون شاهد علي رحيل ملوك وحكام وأنظمة بحالها
القصر تابع لرئاسة الجمهورية وتحت سيطرة القوات البحرية لكنه مسجل كأثر اسلامي وبعد الثورة 2011 اتفتحت بعض قاعات القصر للزيارة بتذكرة قدرها "250ج" للمصري لكنه ده مافضلش كتير ورجعت تاني قفلته رئاسة الجمهورية
وعلي حد معلوماتي البسيطة مافيش ولا قصر ملكي
"وانا قولت قصر ملكي مش قصور أمراء" مفتوح للزيارة من اول قصر عابدين والقبة للمنتزه ورأس التين وغيرهم …..!!
وكلهم تحت وطأة رئاسة الجمهورية
في أي دولة من دول العالم المحترمة القصور دي بتكون مفتوحة للزيارة وبتتقفل لما بيكون فيه استقبال او استضافة لشخصية من الشخصيات المهمة ده قصر باكنجهام نفسه مفتوح للزيارة …
لكن عندنا القصور كانت ومازلت للحكام ورجال الحاشية والبلاط
ليست هناك تعليقات:
إرسال تعليق